KALIBO, Aklan — Gin-insister ni Aklan Rehabilitation Center (ARC) jail warden Pedrito Escarilla sa plenaryo sa ginpatigayon nga committee hearing it Sangguniang Panlalawigan nga ro anang boss eamang hay si Governor Florencio Miraflores ag ro korte.
Bangud kara, uwa sa anang mandato nga magta-o it kopya sa SP ukon maskin sa media kaangot sa anang ginahimo nga aksyon sa ginapangatubang nga isyu.
Raya ro naging sabat ni Escarilla sa waea-tuo nga batikos kana it media personnel bangud sa paghipos nana sa pagka-eskapo it daywang ka mga inmates nga sanday JR Isuga Ruiz nga ko ulihi hay nadakpan man sa Brgy. Cabayugan, Malinao ag si Jose Tropa nga padayon sa gihapon makaron nga ginatugis.
Suno kana, base sa andang rules sa sueod it pasilidad, ginabawaean ro media personnel nga mag-interview sa mga inmates mag-eowas eon lang kon sambilog sanda sa mga nagabisita sa preso.
Ginpahayag dugang nga bukon it sa tanan nga oras hay kinahang-ean kara nga i-broadcast ro anang trabaho bangud nga direkta imaw nga naga-report sa taeatapan it office of the governor.
Nabuking man sa nasambit nga pagpamati nga kapin sa P35,000 ro budget sa pag-transport sa presu sa Manila para sa pagtambong sa anang court hearing sa kasong murder.
