KALIBO, Aklan–Makabig nga kalbaryo para sa mga tricycle drivers sa banwa it Kalibo ro pagtinaas it presyo sa gasolina, apang wa sanda it mahimu kundi padayon nga magbiyahe.
Suno kay Federation of Kalibo Tricyle Operators and drivers Association Inc. Ukon FOKTODAI President Johnny Damian nga ro pagbiyahe sigon it sangka driver hay nakadepende eon lang sa hugod ag diskarte agud nga maskin paalin hay may maiuli nga kita sa andang pamilya ag makabakae it mga kinanghaeanon.
Suno pa kay Damian nga indi dapat magsalig ro pilang ka mga drivers sa ayuda nga maghalin sa gobyerno,kung may tyansa sigon nga ubrahon ro masarangan para makabiyahe hay magbiyahe ag indi mag tinamad bangud sa ginahueat nga ayuda.
Sa pihak nga parte, mabahoe man nga bulig para sa pampublikong mga saeakyan ro amat-amat nga pagbalik sa normal it andang pagbiyahe bangud makabig nga nag-abo eon ro pasahero kasunod it pagpaidaeom sa bilog nga probinsya it Aklan sa mas haeuga nga sueundanan.
