Sigidas ro pagsigabong it mga missiles nga naiintercept sa airspace it Tel Aviv, Israel kasunod it retaliatory attack it Iran.
Suno kay Bombo International News Correspondent Melly Jean Novilla, kada minuto suno kana hay mabatian ro alarm ag sirena sa sentro it nasyon rason nga madasig man sanda nga nagasueod sa bomb shelter agud nga maeowas ro andang kaugalingon ag bilog nga pamilya.
Maskin sanay eon sigon imaw sa makaraya nga sitwasyon apang una gihapon ro kahadlok ag koeba bangud nga kaibahan eon ro Estados Unidos sa nasambit nga gyera.
Paralisado man ro negosyo, trabaho ag sueod sa eskwelahan it mga estudyante bangud sa sigidas nga pagpaeopad it missiles it Iran bilang baeos sa joint combat operation it Estados Unidos ag Israel.
Samtang, ginkumpirma man ni Novilla nga sangka pinay caregiver ro namatay matapos nga tamaan it missile ro anang apartment kaibahan ro ginaalagaan kara nga magueang samtang nagadali-dali kunta nga magsueod sa bomb shelter.
Medyo may kalumaan eon suno kana ro apartment rason nga madasig raya nga natupok kat tamaan it missile.
