KALIBO, Aklan – – – Sangka 52 anyos nga journalist nga nagatrabaho sa Finnish Broadcasting Company ro nagpaabot it e-mail sa Bombo Radyo Kalibo agud ipaabot nga makaabot ro signal kara sa bahin it Finland.
Suno kay Mika Makelainen nga sangka pinasahe nga kahigayunan para kana ag makabig nga swerte nga mabatian ro pag-broadcast it Bombo Radyo.
Sa nagtaliwan sigon nga 37 anyos hay gina tinguhaan it andang estasyon partikular eon ro Dxing nga makasagap it signal maghalin sa mga maeayong radio stations kun sa siin raya sigon ro anang pinaka-numero unong gina kahiligan.
Nasayuran nga masobra sa 200 eon sigon nga mga estasyon it radyo sa magkaeain-eain nga parte it kalibotan ro anang na-monitor.
Suno pa kay Mika nga ro anang equipment nga sangka “Perseus” type communications receiver hay may array nga 3,000-feet/1-kilometer-long wire antennas, kun sa siin ro sambilog kara hay nagatumbok sa direksiyon it Bombo Kalibo.
Suno pa kana apisar sa masyado kaeamig nga tiempo sa andang nasyun bangud sa snow apang, malipayon imaw sa anang maisot nga cabin samtang naga pamati sa AM radio signals maghalin sa magkaeain-eain nga parte it kalibotan.
Bilang pamatuod, nagpadaea pa it litrato si Mika kaibahan ro anang pamilya kamana man it recorded audio kun sa siin mabatian ro boses ni Bombo Leonard Viray samtang naga patigayun it Zona Libre Program.
Gin pahayag dugang pa kara nga eubus ro anang kalipay matapos nga makaabot ro signal it Bombo Radyo Kalibo sa Finland.
