Naglunsar it silent strike sa mabahuean nga kabisera ro mga protester kasunod it pagmarka it ikaywang anibersaryo it ‘kudeta’ it military junta sa Myanmar nga nagpahalin sa dating leader nga si Nobel laureate Aung San Suu Kyi.
Nakataeana man nga maga-isyu ro military junta it pahayag kung siin nakabase kara kung pahabaon pa ro state of emergency sa Myanmar antes ro planong junta election sa Agosto makarong dag-on nga gintawag nga pagkunwari it mga kritiko para mapabilin sa posisyon.
Una eon nga nagdeklara ro junta leader nga si Commander-in-Chief of Defence Services Min Aung Hlaing it state of emergency sa Myanmar sa sueod it sang dag-on kat pumungko raya sa pwesto ag pinahaba pa it daywang dag-on.
Nagpapanaog man kahapon it dugang pang sanctions sa energy officials ag miyembro it military junta ro United States ag ibang mga kaalyado nkara kaibahan ro United Kingdom, Australia ag Canada sa Myanmar.
Kung madumduman, ko Pebrero 1, 2021 ginlunsar it kudeta ro military junta sa Myanmar ag naagaw kara ro otoridad nga eabag sa kagustuhan it pumueuyo nga nagresulta sa pagkalugmok it nasyon sa krisis sa pulitika, ekonomiya ag humanitarian crisis.
Sandig sa local monitoring group, masobra 2,900 katawo ro napatay sa military crackdown umpisa nga maboue ro otoridad ag masobra 18,000 indibdiwal man ro naaresto.
