Eubusan eon nga naging laye ro SIM Card Registration matapos raya nga pirmahan ni Pangueong Ferdinand Marcos Jr.
Sa idaeum it naaprubahang Republic Act 11934, nakabaehag kara nga mandatory nga maiparehistro it sangka cellphone owner/ subscriber ro anang gamit nga SIM card.
Sa pagparehistro, kinahangean nga itau it subscriber ro andang pangaean ag address.
Kinahangean man nanda nga magpakita it government issued-IDs nga may kaeakip nga litrato sa pagparehistro.
Tuyo it laye nga wakasan ro mga krimen nga pagahimuon gamit ro SIM card, kaibahan eon ro pagpangloko it mga kawatan ag mga text scam nga naging eapnaag ko nagtaliwan nga mga binuean.
Nabudlayan ro mga awtoridad nga masolbar ro makarondaya nga mga klase it krimen .
Owa it record kun sin-o ro tag-ana it SIM gamit sa krimen.
Ginpasiguro man it gobyerno nga magapabilin nga confidential ro tanan nga mga impormasyon sa pagparehistro mag-eowas kun subscriber ro nagapasugot sa pag-access sa anang impormasyon.
Sa pilipinas, kun sa siin maskin ro mga unga hay may cellphone man, sa andang mga ginikanan ag guardian maiparehistro ro SIM.
Siyempre pa may iba nga kato pa man hay kontra eon sa nasambit nga laye maskin nga owa pa nakikita nga basi nga may maging manami man nga resulta.
Paeag sigon raya sa kinamatarung sa privacy ag data protection.
Ginakuwestyon ro pagtau it importanteng personal details it sangka subscriber.
Kun madumduman nga makarondaya man ro nakita it mga kontrabida angot sa National ID.
Makangawa-ngawa nga pirmeng kinamatarung sigon sa privacy ag data protection ro ginahambae it mga kontra, sa pihak nga kon naga-apply man sanda sa pilang government IDs hay makarondaya man nga mga impormasyon ro ginabo-oe kanda, apang owa it reklamo.
Kun makapamayad ag makabulig raya sa kaabuan dapat naton nga testingan .
