KALIBO, Aklan—Nagpadumdum ro simbahang katolika nga doblehon ro pagdahan agud nga malikawan ro disgrasya sa nagahilapit nga selebrasyon it kapistahan ni San Juan de Bautista sa Hunyo 24.
Raya ro ginpahayag ni Fr. Tudd Belandres, Parish Moderator it St. John The Baptist Cathedral kadungan sa ginaeauman nga pagpatigayon it waea-tuo nga outing it mga pumueuyu.
Suno kay Fr. Tudd nga dapat nga maging responsabli ro mga tumueu-o sa pagkinasadya samtang ginaselebrar ro pagdumdum sa pagbunyag ni San Juan Bautista sa atong manunubos nga si Hesus.
Ginpahayag dugang ni Fr. Tudd nga antes kunta nga magpatigayon it mga excursion hay magsimba anay ag magpangamuyo bangud nga ro matuod-tuod nga pagdumdum sa kapistahan it mga santo hay selebrasyon ag pagpakita it pagtu-o ag bukon it ro pagpatigayon it mga naka-ugalian , nakasanayan ag tradisyon.
Nasayuran nga ro tradisyonal nga pamaagi it pagdumdum sa kapistahan it San Juan hay ro pagpaligos sa mga baybayon, kasubaan ag mga swimming pools.
May mga nakalinya suno kana nga aktibidad ro lokal nga gobyerno it Kalibo, apang mas ginatutukan it simbahan ro espiritwal nga aspeto.
Suno kana nga mas importanteng makilaea it mga pumueuyu ro patron it banwa it Kalibo nga si San Juan Bautista bilang simbolo it huwaran it pagiging mapina-ubuson ag eubus nga nagapalangga sa Diyos nga sobra pa sa anuman nga materyal nga bagay ag sa anang kaugalingon.
Ro kapistahan man sigon hay nagasimbolo it matuod nga reconcilliation ukon pagbalik sa sabak it Diyos pinaagi sa paglimpyo sa mga saea nga nahimo.
Sa pihak nga parte, ginpaabot ni Fr. Tudd nga sa Hunyo 23 alas-9:00 it agahon hay magapatigayon sanda it tradisyonal nga mobile procession kadungan ro pag-bendisyon sa mga tawo nga naga-abang.
Igalibot sigon kara ro imahe ni San Juan sa palibot it banwa it Kalibo samtang sa Hunyo 24 hay may mga scheduled masses sa alas-6:00, alas-7:00 ag alas-8:00 it agahon kamana man alas-5:00 sa hapon.
Sigidas man makaron ro ginapatigayon nga novena masses and prayers nga partikular nga nakatutok sa pagpangamuyo sa paglikaw sa mga kalamidad.
