BANGA, Aklan—Nagpatigayon ro simbahang katolika it deliverance prayer para sa naeomos nga binatilyo nga si Jhuros Flores nga ginpangunahan nanday Rev. Fr. Jose Novelino S. Inguillo, Parish Priest it St. Blaise Parish, Torralba, Banga ag Rev. Fr. Marvin T. Baylon, Parish Priest of Our Lady it Guadalupe Parish, Madalag kaibahan ro anang bilog nga pamilya, adlaw it Lunes.
Raya hay matapos nga haeos sang dominggo eon ro pag-inusoy it gintingob nga pwersa it mga rescuers, divers ag volunteers emergency responders sa eawas it grade 10 student nga naeomo sa Aklan River nga sakop it Barangay Polo, Banga ko Enero 29.
Maging ro mga faith healer hay nagpatigayon man it andang pagban-aw hasta sa umabot nga ginpasapi ro kaeag ni Jhorus sa anang tiya ag naistorya mismo raya it anang ina.
Eksakto sang dominggo hin-aga nga adlaw it Miyerkules ro pagkaeomos it binatilyo kon sa siin uwa gihapon nakit-an ro anang eawas.
Abo ro nagpaabot it bulig sa pamilya kon sa siin nagmarka raya sa kasaysayan it probinsya matapos nga imaw eamang ro ginapahayag nga naeomos nga nakaangkon it maeapnagon nga search, rescue and retrieval operation nga ginkabuliganan it mga Municipal Disaster Risk Reduction Management Office sa bilog nga probinsya it Aklan.
