KALIBO, Aklan—Sa atubang it covid 19 pandemic, nagpatuman it no contact ro simbahan sa pagdumdum it Ash Wednesday nga senyales man it pag-umpisa it tiempo it kuwaresma.
Suno kay Reverend Fr. Tudd Belandres it St. John the Baptist Cathedral, sa baylo nga ro tradisyunal nga pagpahid it abo sa dahi hay ginabudbud lang raya sa ueo it mga nagasimba.
Sa pilang lugar suno kana hay nagagamit it cotton balls sa pagpahid it abo.
Kadungan kara, gin engganyo ni Fr. Tudd ro mga tumueu-o nga magtambong sa mga misa bilang pagbuylog sa Ash Wednesday.
Pila sigon sa mga importanteng hilimuon sa raya nga tiempo hay ro pagpangamuyo, pagpu-asa ag paglimos ukon pagtau it bulig sa mga nagakinahangean.
Agud nga malikawan ro pagbuhos it mga tawo sa simbahan, ginpakamayad sigon nanda nga magpatigayon it pag badlis sa mga kabarangayan.
Uman kara nga ginpadumdum nga hasta sa 50% eamang it kabilugang kapasidad it simbahan ro ginapasugtan nga makasueod
Obligado man ro tanan nga magsunod sa health and safety protocols para sa kaeowasan it tanan.
