KALIBO, Aklan — Ginaengganyo it Simbahang Katolika ro mga residente ag turista sa Boracay nga magpartisipar sa igapatigayong community station of the Cross nga pagadunganan it clean up drive sa binit it baybayon it isla sa maabot nga Biyernes Santo.
Suno kay Rev. Fr. Tudd Belandres, parish moderator it Holy Rosary Parish sa Boracay nga “Ora et Labora” ukon Pray and Work ro tema it andang pagahimuong Via Crusis halin sa Manocmanoc chapel hasta sa andang simbahan sa Balabag kon siin magaagi sanda sa frontbeach.
Magdaea sigon sanda it plastic bag agud butangan it mga mapueot nga basura.
Ginpahayag pa ni Fr. Tudd nga ginapahauman nanda ro Semana Santa bangud sa pagbuhos it mga turistang Katoliko sa simbahan it Holy Rosary Parish nga ginadungan ro bakasyon ag pagpamaeandong sa tyempo it Kuwaresma.
