KALIBO, Aklan—All set and ready eon ro Laserna Integrated School sa banwa it Nabas sa pagpatigayon it limitadong face-to-face classes it mga estudyante sa nasambit nga lugar.
Suno kay Dr. Mac Aposin, Schools Division Superitendent it Department of Education ukon DepEd-Aklan nga mahabang tiempo eon ro andang gintaeana agud nga tun-an ro implementasyon it pilot face-to face classes sa tunga it COVID-19 pandemic ag pilang “finishing touches” eon lang ro kinahangeanon para sa pagpatigayon kara sa maabot nga Nobyembe 15 hasta Enero 31, 2022.
Sa kamatuoran suno kana, hin-aga nga adlaw it huwebes hay magapatigayon sanda it simulation exercises bilang pagpahaum sa face to face classes.
Nasayuran nga ro Laserna Integrated School eamang ro naga-isaeahanon nga eskwelahan sa aklan ag kaibahan sa tatlong pampublikong eskwelahan sa western visayas nga na-qualify para sa ginaproponer nga pilot testing it face to face classes bangud sa manaba nga kaso it covid 19.
Haeos 120 nga eskwelahan sa bilog nga nasyon ro magabalik sa face to face classes sa nasambit nga petsa.
Ginklaru pa it opisyal nga kindergarten hasta grade 3 eamang ro magapasakop.
Magabuhay ro klase it maximum nga tatlong oras sa kinder samtang sa Grade 1 hasta 3 hay posibleng abuton it ap-at nga oras ag tunga.
Gindugang pa ni Aposin nga magataeana ro eskwelahan it waeo nga classrooms kun sa siin 12 nga mga learners eamang ro pagapasugtan sa sangka klase sa kinder ag 16 sa grade 1 hasta 3.
Pagatunga-on ro mga estudyante sa daywang sections nga magabueos-bueos nga maga attend it half-day nga klase kada domingo sa masunod nga daywang buean.
Magapadayun sigon sanda it andang distance learning gamit ro modules.
Samtang, kaibahan sa andang ginpahaum ro pagbutang it shield nga plastic cover sa pungkuan it kada estudyante.
Dapat man nga may parents consent ro pagsueod it estudyante ag owa raya it pieilitan.
