KALIBO, Aklan—Nag-abot eon sa 19 nga turista sa isla it Boracay ro naaresto bangud sa pagpameke it covid 19 test result.
Matapos nga maaresto ro 6 nga turista sa Boracay bangud sa pagpresenta it pekeng swab test result ko Disyembre 7, owa gihapon namadla ro iba.
Ko buean man it Disyembre hay daywa pang indibidwal halin sa Manila ro naghana nga magsueod it Boracay daea ro andang pekeng covid 19 test result.
Raya hay nasundan pa it 10 nga turistang sumakay it roro vessel halin sa Batangas paagto it Caticlan.
Ag ko Huwebes nga adlaw, sangka babayeng turista nga halin sa Manila ro gindakop man sa Caticlan Airport bangud sa kaparehong pag-eabag.
Suno kay Provincial Administrator Atty. Selwyn Ibarreta kaabuan sa ginaboe-an it pekeng covid 19 test result hay ginakopya ro letterhead it sangka mabahoe nga ospital sa Manila.
Bangud kara, mabahoe ro anang pagduda nga posibleng may sindikato sa likod it pagpameke.
Haeos masae-an sigon nga lehitimo ro mga ginpeke nga test result bangud nga kopyang-kopya kara ro mga orihinal.
Gindugang pa ni Ibaretta nga agud nga makasigurado hay ginatawagan nanda ro mga clinic nga nag isyu kara.
Mas ginhugtan man it lokal nga gobyerno ro andang seguridad kasunod it mga insidente it pagpameke it mga requirements.
Mag-eowas sa mga pasahero nga nagasakay it eroplano, obligado man makaron nga magpakita it QR code ro mga pasahero nga nagasakay it roro vessel halin sa mindoro port paagto it Caticlan jetty port.
Ro mga turistang nadakpan hay insigidang gindaea sa quarantine facility
Nagapangatubang ro mga raya sa reklamong pag eabag sa RA11332 ag falsification of documents.
