KALIBO, Aklan — Gindeklara it Site Task Group Atifest 2026 sa ginpatigayon nga closing and awarding ceremony sa Camp Pastor Martelino nga naging maayos ag eowas ro Kalibo Sr. Sto. Niño Ati-Atihan Festival 2026 matapos nga owa it nailistang major untoward incident sa sang domingo nga selebrasyon.
Suno kay P/Col. Arpha Abul Kyr Salazar Macalangcom Jr., Deputy Regional Director for Operations it Police Regional Office, ginpabaskog ro mga tikang sa seguridad agud nga maprotektahan ro libu-libong nagtambong ag madinaeag-on nga napabilin it kapulisan ro kalinong ag kaayusan sa bilog nga selebrasyon.
Ginaboeobanta nga 250,000 katawo ro nagtambong sa mismong adlaw it kapistahan.
Ginkasa ro maeapnagon nga security coverage sa bulig it masobra sa 3,200 nga tawuhan it PNP, Bureau of Fire Protection, Philippine Coast Guard, mga disaster response unit, ag iba pang mga force multiplier nga gindeploy sa idaeum it Site Task Group “AtiFest 2026.”
Nauna kara, ginpahayag it PNP nga nakabulig ro aktibong intelligence work, proactive engagement sa mga potential troublemakers, hugut nga crowd control, ag close coordination sa nagkaeain-eain nga ahensya agud nga mapugngan ro mga insidente antes pa man mag-grabe ro mga raya.
Ginpabakod man ro kahauman pinaagi sa pagtukod it mga staging area, pag-activate it sangka joint operations center nga may CCTV monitoring, ag pagbutang it mga women and children protection desk sa mga nagapangunang lugar.
Samtang, gindayaw man ni P/Col. Macalangcom ro kapulisan, natungdan nga ahensya it gobyerno, LGU Kalibo ag ro publiko sa andang pakikipagbueuligan agud nga mapabilin nga eowas ro selebrasyon.
