Kalibo Aklan —– Nagapabilin nga normal ro sitwasyun sa banwa it Libacao sa pihak nga nakalista eon sanda it sangka positibong kaso it coronavirus disease ukon COVID-19.
Suno kay Libacao Mayor Charito Navarosa nga hugut nana nga ginapatuman ro mga patakaran it National Government ag ko gobyerno probinsiyal kapareho it curfew, social distancing ag stay at home policy.
Gindugang pa ni Mayor Navarosa nga ginapasugtan man nana ro mga inisyatibo it ibang Barangay nga nagatukod it mobile palengke agud nga malikawan ro pagtumpok-tumpok it mga tawo .
Gin-umpisahan eon man sigon nanda ro scheme nga gina-schedule ro pagpanindahan it kada Barangay sa Libacao Public Market, apang pwede pa nga mabag-o depende sa mandu it nasyunal.
Sa pihak nga parte, ginkumpirma it opisyal nga 16 nga miyembro it Barangay Health Emergency Response Team (BHERT), driver it ambulansiya ag sangka midwife nga nakasalamuha it pasyente ro ginakabig makaron nga persons under monitoring .
Ginbalik man sigon sa Provincial Hospital ro pasyente agud nga hugut pa nga mabantayan .
Apang una eon sigon raya sa stable nga kundisyon .
Samtang, nagpanawagan it kooperasyon sa publiko si mayor navarosa engkaso nga may mataeupangdan nga ibang tawo nga bukon it taglugar hay insigidang i-report sa andang Barangay Official .
Raya hay kasunod it hugut nga ginapatuman nga checkpoint sa boundary nanda sa Capiz, Antique ag Iloilo.
