KALIBO, Aklan—Nagapabilin nga maayos ro sitwasyon makarun sa Missouri sa pihak it pagtama it tornado ukon ipo-ipo sa central ag southern US kun sa siin apektado ro estado it Arkansas, Illinois, Kentucky, Missouri, Mississippi ag Tennessee.
Suno kay Bombo International Correspondent Anecita Sancho Alvizo it Missouri, U.S.A nga owa it masyadong naging epekto sa andang estado ro grabe pagpanaeaa it ipo-ipo , apang ro estado it Kentucky sigon hay nakalista it maabong numero it mga namatay.
Dugang pa kara nga posibleng nag-abot sa 100 ro mga nailistang namatay sa Kentucky pa eamang.
May kaeapad ro nasambit nga tornado nga 200 miles maghalin sa Arkansas hasta sa Kentucky.
Sambilog sa mga grabe nga naapektuhan hay ro sites sa southwestern Kentucky city it Mayfield.
Tumama ro Tornado sa candle factory Biyernes it gabi-e ag may unang kapin sa 110 katawo ro una sa sueod kara.
Sa pagtama man it mga tornado, daywa eun ro namatay sa Arkansas ag sambilog sa Mississippi.
Sa Tennessee, maabong edipisyo ro nasamad ag ag na-trap ro mga tawo.
Samtang sa Illinois man, nasamad ro Amazon warehouse bangud sa mabaskog nga uean ag hangin.
Sa makarun hay indi magnaba sa 157,000 customer ro nadueaan it kuryente sa an-om nga estado.
