KALIBO, Aklan—Amat-amat eon nga nagabalik sa normal ro nasyon it Kuwait matapos ro pilang buean nga pakikipagsukoe sa coronavirus disease ukon Covid-19 pandemic.
Suno kay Bombo International Correspondent Mrs. Rizza Indemne, tubong banwa it Lezo apang presenteng nagatrabaho sa nasambit nga nasyon, ginbawi eon ro ginpatuman nga curfew bangud nga uwa eon haeos it naililistang kaso it covid infections.
Balik-operasyon eon man ro mga negosyo mapa-essential ukon dry goods provided nga ginasunod it mga raya ro minimum health protocols nga ginapatuman it andang health authorities.
Ginpahayag dugang ni Mrs. Indemne nga strikto gihapon nga ginapatuman ro mandatory nga pagsuksok it face mask eabi eon sa mga pampublikong lugar.
Sa oras sigon nga mataeopangdan ka nga uwa nagasuksok it face mask hay otomatiko kang paga-arestuhon ag ideretso sa taeatapan it pulisya.
Si employer sigon dayon ro magapyansa kimu.
Apang, inde malikawan nga may una gid nga uwa nagasunod sa mga protocols kon sa siin uwa eon nasusunod ro physical distancing.
Sa makaron ro Kuwait hay nakalista it kabilugang kaso it Covid-19 nga nagaabot sa 104,568.
Sa nasambit nga numero, 607 ro namatay bangud sa nasambit nga deadly virus samtang 96,049 eon ro nakarecover matapos ro pagbueong ag quarantine protocol.
