Kalibo Aklan —— Nagapabilin nga normal ro sitwasyon sa Longtan Taoyuan, Taiwan.
Raya hay maskin nga nagapadayon ro paeag it 2019 coronavirus disease (COVID-19) pandemic.
Suno kay Bombo International Correspondent Chine Rose Nicodemus, mahinadlukon ro mga tawo sa Taiwan rason kat nagpaguwa it advice ro gobyerno nga ipatuman ro physical distancing ag magsuksok it face mask hay gilayon nga nagasunod ro mga tawo.
Owa suno kana it mga establisyimento ukon kompanya nga sarado mag-eowas eon lang kon may sambilog nga magpositibo sa sangka trabaho hay gilayon raya nga i-lockdown.
Suno pa kay Nicodemus, sanda nga mga Pinoy hay pag-uli sa tagsa nanda ka dormitoryo hay insigida sandang nagapaligos ag nagagamit alcohol agud nga makalikaw man sa makamaeatay nga virus.
Ro anda nga kumpanya suno kana hay nagaprovide it face mask kanda bangud nga ro madakpan nga uwa it suksok nga face mask hay posible raya nga maimponeran it penalidad ukon multa.
Tanan nga maagyan, mapungkuan, matiniran ukon makan-an it mga tawo hay gilayon nga gina-disinfect agud nga inde eon magkalhit ro virus rason nga nagapabilin sa 425 ro kaso it COVID-19 sa nasyon kon sa siin sa nasambitang numero, an-om paeang ro namatay samtang 217 eon ro nakarekober.
