KALIBO, Aklan—“Manageable” pa sa makarun ro sitwasyon sa mga lugar nga ginpaidaeom sa granular ag surgical lockdown partikular ro area it Purok 1, 2, 3, 4, 5 ag 6 it C. Laserna Street; ag pilang parte it Mabini ag Sto. Niño Village.
Raya ro naging pahayag ni P/Maj Belzhassar Villanoche, hepe it Kalibo PNP sa interbyu it bombo radyo.
Suno kana nga umpisa kat ginpatuman ro granular enhance community quarantine (ECQ) hay hugot nga ginabantayan it mga otoridad ro entrance ag exit point sa mga nasambitan nga lugar.
Owa man ginapasugtan nga makaguwa sa andang tagsa ka mga panimaeay ro pomoeuyo mag-euwas eamang sa mga Authorized Person Outside Residence ukon APOR kapareho it mga municipal ag barangay officials , medical personnel, provincial health worker, barangay tanod ,philippine national police ag Philippine army.
Samtang, engkaso nga may emerhensiya hay pwede man nga magpangayo it bulig sa otoridad.
Kung nagakinahangean it bueong hay pwedeng magpabakae sa mga nagabantay nga barangay tanod.
Sa pihak kara, naga-apela gihapon imaw sa mga pomoeuyo nga apektado it ginapatuman nga lockdown nga magkooperar eun lang sa mga otoridad.
