KALIBO, Aklan—Nagapabilin nga matawhay ro sitwasyon sa Ukraine apisar nga nagposte eon it masobra 100,000 nga soldado ro Russia sa andang border.
Suno kay Bombo International Correspondent Shirley Santosildes, tumandok it Tobias Fornier, Antique apang presenteng nagatrabaho sa Ukraine bilang sangka manugturo nga owa pa it nagakatabo nga anumang kinagamo sa sueod it andang nasyon.
Apang, haum sigon sanda engkaso nga makaangkon it grabe nga tensyon sa tunga it daywang nasyon.
Ginpahayag ni Santosildes nga nag-umpisa ro tensyon matapos nga matueopangdan it Russia nga plano it gobyerno it Ukraine nga makipag-alyansa sa North Atlantic Treaty Organization (NATO) forces.
Dag-on 2014 suno kana kat nakaangkon it unang giyera ro daywang nasyon matapos nga sakupon it Russia ro isla it Crimea.
Matueopangdan nga dati eon nga ginsakop it Russia ro Ukraine sa sueod it pilang dag-on.
Sa pihak nga parte, nakipagpueong eon sigon sanda sa Philippine Embassy nga nakabase sa Poland para talakayon ro pilang ka mga tikang engkaso nga mag-umpisa ro kinagamo.
Posible sigon nga ipatuman ro pagbakwit sa mga Overseas Filipino Workers (OFWs) kung ipasaka ro Alert Level sa nasambit nga nasyon.
Si Santosildes hay masobra siyam nga dag-on eon nga nagatrabaho sa Ukraine.
