KALIBO, Aklan—Nagkasugot ro mga opisyal it sangguniang kabataan ag barangay council it polo new washington para sa sangka blood donation activity sa sabado nga adlaw, hulyo 11, 2020 nga maga-umpisa bandang alas-8:00 it agahon sa pavement it nasambit nga barangay.
Angot kara, gin-imbitahan ni barangay kapitan alberto “nonoy” natal pinaagi sa bombo radyo kalibo ro tanan nga mga pumueuyu it new washington ag iba pang banwa nga magpasakop sa libreng pagpabo-oe it dugo.
Tuyo sigon it nasambit nga tikang nga makatipon sanda it nagakaigo nga numero it dugo nga maitau sa Philippine Red Cross para magamit it mga pasyente sa tiempo it pagkinahangean.
Madumduman nga nauna eon nga nagpanawagan ro PRC it pagkinahangean it dugo bangud sa kakueangan it mga naga-donate sa atubang it ginapangatubang nga coronavirus disease ukon COVID-19.
Ro kakueangan it dugo ro sambilog sa mga ginapangatubang nga problema it mga ospital sa nasyon , kun sa siin, kinahangean pa nga mag-usoy it blood donor para sa pasyente eabi eon sa mga kaso nga may emerhensiya.
Gindugang pa kara nga kada dag-on nanda nga ginaduso ro nasambit nga aktibidad bangud nga bukon eamang ro mga nagakinahangean nga pasyente ro masugpunan kara it kabuhi kundi nga makabulig man raya sa tawo nga nagatau it dugo agud nga uman nga mabayluhan it bag-o ro dugo nga naga-ilig sa andang mga ugat nga magiging yabe agud nga mas pang maging mabaskog ag makapabata kanda .
Ro mga successful blood donor hay makabaton it daywang kilo nga bugas, may libre nga pamahaw ag blood donor card .
