KALIBO, Aklan—Nagapadayun makaron ro programa it Smoke Free Aklan kabulig ro Provincial Health Office para ipaeapnaag ro kampanya kontra sa pagpanigarilyo.
Suno kay Mr. Jeus Padilla, Coordinator it Smoke Free Aklan nga gina-engganyo nanda ro kada lokal nga gobyerno nga magpasakop sa andang programa.
Sa kamatuoran suno kana hay may ginatao sanda nga Red Orchid Award halin sa Department of Health (DOH.
Raya sigon hay sangka prestihiyosong award nga ginatao sa sangka LGU nga maka-comply sa pila nandang criteria.
Sambilog sigon sa nagapangunang basehan nanda sa pagtao it pagpasidungog hay ro Anti-smoking ordinance it sangka banwa.
Haeos tanan sigon nga banwa sa Aklan hay nagpatuman eon it nasambit nga ordinansa mag-euwas sa banwa it Malay.
Ginpahayag pa ni Padilla nga hugut ro andang kampanya kontra sa pagpanigarilyo bangud sa maeain kara nga epekto sa eawas it sangka tawo.
Ko kan-o eamang hay nag-organisa sanda it sangka twitter party kung siin ginpanawagan kara sa nagtaliwan nga administrasyon ni Pangueong Rodrigo Duterte nga i-veto ro vape bill.
Sa pihak nga parte, ginpaathag man ni Psyche Mae Villorente-Ruiz, Medical technologist I it PHO-Aklan nga dapat masayuran it publiko ro importansya it tamang pag-alaga sa ikaayong eawas ag palibot.
Dapat sigon nga protektahan ro eawas halin sa maeain nga epekto it bisyo kapareho it pagsigarilyo.
Pila sigon sa mga ginpatigayun nanda nga aktibdad kaibahan ro Smoke Free Aklan hay ro cleanup drive sa mga baybayon.
Raya sigon hay una nanda nga ginlunsar sa isla it Boracay ag Bel-is beach sa banwa it Buruanga.
