Padayun ro smuggling it agri products ag medyu owa it senyales nga maputoe ro maeain nga hilimuon ngara .
Sa nagakatabu, medyu owa it nahadlok nga smugglers kay President Ferdinand Marcos Jr. ag maskin sa presenteng commissioner it Bureau of Customs (BOC) nga si Commissioner Yogi Filemon Ruiz.
Kun may kahadlok, ham-an nga padayun sa gihapon ro pagdagsa it smuggled agri products nga ginaeakipan it asukar, tinuea, prutas ag maskin it karne.
Ginpahayag kato ni Marcos Jr. nga pagabantayan it mayad it BOC agud nga owa it makasueod nga illegal shipments.
Ro BOC hay sambilog sa ginaboe-an it mabahoe nga revenue rason nga dapat nga bantayan.
Sambilog man sa gina alagaan ni Marcos hay ro Department of Agriculture bangud nga handum nana nga makaangkon it bastanteng pagkaon ro nasyon.
Gusto nana nga makaangkon it bugana nga ani agud nga maabung pagkaon sa lamesa ro mga Pilipino.
Agud nga mataw-an it katumanan ro anang handum, ginbuytan nana ro pagiging DA secretary.
Apang sa pihak it mga pag instrikto, padayun sa gihapon ro smuggling ag medyu owa eon it nahadlok sa mga paandam ni Marcos Jr.
Ko nagtaliwan nga domingo eang, ginatantiya nga P228 milyon pesos nga balor it imported nga asukar nga halin sa Thailand ro narekober it BOC.
Owa nakabutang kon sin-o ro consignee it kargamento.
Nagpaandam man ro pilang mamalidha nga mas pang maga-grabe ro smuggling makaron nga nagahilapit ro Christmas season.
Magabuhos ro agri products kapareho it asukar ag igatago.
Kon makaangkon it kakueangan, dayun raya nga igapaguwa apang mataas eon ro presyo.
Pati sigon ro karne it baboy hay posibleng magbaha makaron nga nagahilapit nga paskwa.
Maabu man nga senador ro nagapanawagan kay Marcos Jr. nga magtaeana eon it permanenteng DA secretary agud nga mabuytan it husto ro taeatapan ag matapna eon ro smuggling it agri products.
Maskin ro igmanghud ni Marcos nga si Senator Imee Marcos hay nagpanawagan sa anang manghud nga magpakita it kaakig sa mga smugglers it agri products.
Masyado eon sigon nga eapnaag ro smuggling ag tiempo eon agud nga maakig sa smugglers.
Dapat guid man nga magpakita it bangkil ro gobyerno kontra sa mga saeot nga smugglers.
Owa it ibang apektado kundi ro mga local nga mangunguma.
Ginapatay sanda it bigtime smugglers.
Kabay nga maghueag eon ro gobyerno.
