KALIBO, Aklan – – – Sangka snatcher nga nagpang-agaw sa bag it sangka turistang babaye ro inaresto sa isla it Boracay.
Gin kilaea ro suspek nga si Edison Ilisan, 24-anyos, tumandok it Culasi, Antique, ag temporaryong naga estar sa isla.
Base sa report it Boracay Tourist Assistance Center (BTAC), samtang naga panikangkon sa karsada ro babayeng biktimang si Zaida Japsay, 36-anyos it Pontevedra, Capiz, kat gulpi eon lang gin habnit it suspek ro anang daeang bag nga may sueod nga daywang cellphone, kwarta ag iba pang mga importanteng dokumento.
Nakaangkon it mga kaeos ro biktima matapos nga makipagsukoe sa suspek kun siin nag dueomugan sandang daywa sa karsada.
Gin bayo pa sigon raya it eaeaki rason nga eubusang naagaw ro anang bag.
Apang, owa pa man nakaeayo, nabaeabagan eon raya it mga naga pamasadang habal-habal driver nga nakasaksi sa insidente ag napilitan si Ilisan nga ipilak ro bag ag madasig nga nag daeagan.
Naaresto ro suspek sa gin patigayung follow-up operation ag gin kulong sa detention cell it BTAC.
