KALIBO, Aklan—Amat-amat eon nga nagakatunaw ro snow nga natipon sa mga karsadahon ag highway sa maabu nga mga lugar sa estado it Texas matapos ro haeos ap-at nga adlaw nga pagpanaeasa it winter storm.
Raya ro ginpahayag ni Bombo International Correspondent Erna Gallagher, tubong banwa it Malinao ag presenteng naga-istar sa Dallas, Texas.
Suno kana nga nagapakita eon ro adlaw ag ro temperatura hay nagsaka eon.
Angot kara, nagpaandam suno kana ro National Weather Service sa pagkahueog it mga mataeum nga tipak it yelo ag buho-buho nga mga daeanon nga mas kilaea man sa tawag nga cobblestone ice sa masunod nga mga inadlaw nga delikado sa mga nagabiyahe.
Apang sa makaron hay grabeng eamig sa gihapon ro andang nabatyagan kun sa siin ro andang mga pagkaon ag ilimnon nga tubi hay ginabutangan it portable heater agud nga indi mag-yelo.
Nagaka-ubusan man suno kana ro mga baligya sa mga grocery stores kun sa siin limitado ro oras it andang operasyon bangud sa ginapatuman nga rolling blackouts.
