KALIBO, Aklan — Nagadaeum ro gulo sa nasyon kasunod it grabeng banggi-anay ag “too much politicking” sa linya it mga lider nga naka-apekto eon sa daeagan it gobyerno ag seguridad.
Raya ro pagpati ni dating provincial board member Nemesio Neron nga nagpungko man dati bilang provincial director it Aklan Police Provincial Office.
Suno kana nga raya ro unang kahigayunan nga may nag-eontad nga tensyon sa Senado matapos ro insidente it pag-einupok sa sueod it building samtang ginahana nga arestuhon si Senador Ronald “Bato” dela Rosa nga may kaangtanan sa warrant it International Criminal Court (ICC).
Dugang pa nga ro sunud-sunod nga insidente halin sa Senate leadership change, impeachment, hasta sa ICC-related arrest hay nagapakita it naga-grabeng political division sa nasyon.
Panawagan ni Neron nga importante makaron ro pagkaeasugot agud nga malikawan ro eubusan nga destabilization it gobyerno.
Sa pihak nga parte, nagapati man si Neron nga makabig nga “invalid” ro warrant of arrest nga ginpaguwa it International Criminal Court kontra kay Senador Dela Rosa.
Suno kana nga owa eon it hurisdiksyon ro ICC sa Pilipinas matapos ro pormal nga paghalin kara sa Rome Statute ko 2019.
Ro anumang imbestigasyon ukon kaso kontra kay dela Rosa angot sa war on drugs hay dapat nga pamatian eamang sa mga lokal nga korte.
Makabig sigon raya nga kawad-an it respeto ag pag-eabag sa soberenya it Pilipinas .
Dugang pa ni Neron nga ro mga third world countries eamang kapareho it Pilipinas ro ginadaog-daog it ICC .
