KALIBO, Aklan—Hugot nga ginapatuman makaron sa mga buses ag jeepney ro social distancing agud nga malikawan nga makaangkon it close contact ro kada isaea bilang pangaman sa 2019 coronavirus disease ukon COVID-19.
Suno kay Roger Tamayo, dispatcher it bus ag jeepney nga may byaheng Libacao-Kalibo vice versa, ginasigurado nanda nga sang metro ro agwat it kada pasahero rason nga katunga eon lang ro pwede makasakay sa behikulo.
Engkaso sigon nga inde sanda magsunod hay inde man gihapon sanda makalusot sa mga nakataeana nga checkpoints ag posible pa nga makasuhan ukon mamultahan sa pag-eabag sa laye nga ginapatuman.
Ro mga pasahero suno kana hay ginarequired nanda nga magsuksok it face mask ag may alcohol man nga ginaprovide ro mga drivers kamana man adlaw-adlaw sanda nagalimpyo sa andang mga behikulo agud nga malikawan ro makamaeatay nga virus.
Suno pa kay Tamayo, ginaistudyuhan makaron it asosasyon nga magpataas it pamasahe bangud sa kakueangan it kita nga inde makabawi maskin sa anda eon lang nga krudo.
Kapin sa P40 ro pamasahe sa jeep ag P44 mat-a ro sa bus kon sa siin alternate ro pagpamasada it mga nasambitang behikulo.
