KALIBO, Aklan—Nagapati si Punong barangay Niel Candelario it Brgy. Poblacion, Kalibo nga kaabuan sa mga nagpositibo sa Coronavirus Disease 2019 ukon COVID-19 hay halin sa mga ginpatigayun nga social gathering.
Suno kana, ro gulpayadang pagtaas sa numero it mga kumpirmadong kaso it deadly virus sa anang nasakupan hay daea it ginpatigayun nga mga okasyon.
Agud nga ma-regulate ro pagtililipon, nagdihn it sangka ordinansa ro mga opisyal it barangay partikular ro Barangay ordinance No. 003 series of 2021.
Raya hay may kaangtanan sa pag-require sa mga nagapatigayon it okasyon sa mga kabaeayan nga magbo-oe anay it barangay clearance.
Ginklaro man kara libre ukon owa it bayad ro nasambit nga clearance .
Nasayuran nga antes ro okasyon kapareho it birthday, kasae, bunyag ag maskin namatyan hay kinahangean anay nga ma-inspection it barangay council ro baeay ukon venue nga pagahiwatan it okasyon agud nga matumod kon pila ro 50 porsiyento nga kapasidad it bisita ag masiguro nga mapatuman ro physical distancing.
Dapat man sigon nga kompleto sa gamit kapareho it logbook, thermal scanner, alcohol, footbath ag iba pa.
Tuyo kara nga matapna ro pagkalhit it Coronavirus kun sa siin ro mga pagtipon-tipon ro ginaturo nga superspreader it virus.
Samtang, padayun man ro pag apela it opisyal sa mga pumueoyo nga seryosohon sa gihapon ro pagsunod it minimum health and safety protocol.
