KALIBO, Aklan—Ginklaro ni Police Colonel Ramir Perlito Perlas, Provincial Director it Aklan Police Provincial Office (APPO) nga ro deployment it pulis ag militar sa boundary it Brgy. Dalagsaan, Libacao hay para magpatigayun it social investigation.
Ro pahayag ni Police Colonel Perlas hay kasunod it mga naga-eutaw nga balita nga may nagakatabo nga recruitment it National People’s Army (NPA) sa nasambit nga lugar.
Suno kana, nagapatigayun it joint community support program ro Philippine National Police ag Armed Forces of the Philippines sa lugar halin pa ko buean it Pebrero.
Raya sigon hay kaparte it andang barangay immersion kun siin nagapatigayun sanda it social investigation sa natungdan nga mga komunidad.
Tuyo sigon kara nga matumod ro problema ag nagapangunang produkto it mga residente para mabuligan sanda sa andang paeangitan-an.
Mag-eowas kara, ginasikyar man nanda ro iba pang kinahang-eanon sa barangay kapareho it daean, tubi, elektrisidad ag signal para sa komunikasyon.
Raya sigon nga programa hay magabuhay it hasta tatlong buean.
Sa pihak nga parte, ginpasaeamatan man ni Police Colonel Perlas ro lokal nga gobyerno it Libacao sa pagtao kanda it espasyo para patindugan it andang company headquarters para sa 1st Aklan Police Mobile Force Company (PMFC).
Raya hay matapos nga isaylo sa Brgy. Rosal, Libacao ro 1st Aklan PMFC kasunod it mando ni dating PNP Chief General Debold Sinas nga i-forward deployment ro mga raya imbes nga magpabilin sa kampo.
Napili sigon nanda ro lugar bangud nga maeapit raya sa boundary kamana man agud nga may haum eagi nga tropa nga mag-responde engkaso nga may magtuhaw nga recruitment it mga rebelde.
