Sangka Venezuelan social media influencer ro nag-obra it kontrobersiya matapos imaw nga magpa-tattoo sa sangka amo.
Nakilaea ro tattoo enthusiast nga si Funky Matas ko 2021 kat makabaton imaw it Guinness World Record sa pag-angkon it masobra sa 200 nga autograph tattoo sa anang likod.
Makaron nga 2023, uman nga nag-obra si Matas it sangag kat mabalita sa bilog nga South America nga may amo imaw nga ginpaidaeum sa training agud nga maka-intigo nga mag-tattoo.
Nag agto sa Mexico si Matas para idtu magpa-tattoo.
May nakilaea imaw nga eaeaki idtu nga may mga alagang amo ag sangka tattoo shop owner.
Sa bulig it daywang monkey trainer, natur-an nanda ro sangka maisot nga amo kon paalin nga magbuyot it tattoo machine sa sueod eamang it daywang oras.
Suno kay Matas, ro ginpabutang nana nga tattoo sa anang siki hay ro logo it NFT project nga “The F8 Club”.
Kat magkalhit ro angot kara sa social media, maabung netizens ro nagbatikos kay Matas ag gin-akusahan imaw it animal cruelty ag pagpapansin sa social media.
Apang ginklaru nana nga safe ro amo ag owa man it natabu nga pagpanakit kara.
Sa tan-aw pa nana, nakabulig ro anang pagpa-tattoo agud makita nga may kaaeam ag ikasarang ro mga amo nga mag-obra it art kapareho it tattoo.
