KALIBO, Aklan—Matapos ro pilang buean nga paghueat, madayon eon ro pagdistribute it kabilugang P6,000 nga social pension sa mga kwalipikadong senior citizens it Kalibo, Aklan.
Raya hay suno kay Sangguniang Bayan (SB) member Augusto Tolentino sa interview it Bombo Radyo Kalibo.
Suno kana, raya eon ro resulta it andang pagtinguha nga makalampag ro Department Social Welfare and Development (DSWD) region 6 matapos nga ro Kalibo eon lang ro uwa nakabaton it social pension sa kabilugang 17 ka mga kabanwahanan it probinsya it Aklan.
Ginpahayag dugang nga base sa pinakaulihing listahan nga ginpaguwa, kapin sa 4,939 senior citizens ro kwalipikadong magabaton it social pension halin sa unang listahan nga umabot sa 5,907.
Maga-umpisa ro pagdistribute it social pension sa Nobyembre 19 nga ginakaeakipan it mga senior citizens it Brgy. Andagao; Bakhaw Sur; Linabuan Norte; Tigayon ag Briones.
Samtang sa Nobyembre 20, ro naka-schedule hay imaw ro Brgy. it New Buswang; Old Buswang; Caano; Mobo; Estancia; Bakhaw Norte ag Nalook.
Kamana man, ro magabaton sa Nobyembre 21 hay ro mga social pensioner it Brgy. Poblacion; Mabilo; Pook ag Tinigao.
Igapatigayon ro distribution it social pension sa Andagao covered court.
