KALIBO, Aklan—Ginlaygayan it gobyerno it South Korea ro andang mga pumueoyo nga inde anay magguwa it andang tagsa ka panimaeay kon uwa it transaction ag inde mag-adto sa mga matawo nga lugar.
Raya hay kasunod it pagkalhit it coronavirus disease ukon COVID-19 sa nasambitang nasyon.
Suno kay Bombo International Correspondent Maylord Guadalope, tubong Brgy. Bay-ang, Batan apang presenteng nagatrabaho sa Gyeongju, South Korea nga makit-an eon ro epekto it makamaeatay nga sakit sa mga manufacturing company.
Paralyze sigon makaron ro mga manufacturer bangud nga ro mga materiales nga ginagamit hay nagahalin sa China.
Nagapanic eon sigon makaron ro mga Koreans bangud sa ginapan-aw nga uwa it maadtunan nga nasyon engkaso nga inde pa matapna ro pagtinaas it kaso it nasambitang sakit.
Apang suno sa andang gobyerno hay masarangan nanda nga tapnaon ro sakit.
Sa makaron sigon hay puro naka-facemask ro mga tawo ag sa group chat eon lang sanda naga-istorya agud nga maging updated sa mga nagakatabo sa nasyon.
