KALIBO, Aklan—Nagapahaum eon ro Provincial Government it mga temporaryong solusyon agud nga mabuligan ro mga mangunguma nga mapahauman ro ginaeauman nga epekto it grabeng El Niño nga posibleng tumama sa ika-ap-at nga quarter it 2026 hasta sa unang quarter it 2027.
Suno kay Aklan Provincial Agriculture Office Department Head Engr. Alexys Apolonio nga kaibahan sa mga ginasueong nga tikang hay ro pagpanupod it solar irrigation systems ag mga maintok nga solar facilities agud nga makaangkon it alternatibong maboe-an it tubi ro mga mangunguma ag mabawasan ro pagdepende sa mga makinang nagagamit it gasolina ukon diesel.
Nag-request eon sigon sanda it supplemental fund para sa mga solar irrigation project makaron nga dag-on.
Nauna eon nanda nga ginlaygayan ro mga mangunguma nga magdahan sa pagtanum it paeay bangud sa mataas nga peligro it kakueangan sa tubi rason nga sangkiri ro nagtanum it paeay makaron nga cropping.
Ginasuhestiyon it anang taeatapan ro pagtanum it mais, monggo ukon baeatong ag tinuea bilang alternatibong pananum ag paeangitan-an.
Sa pihak kara, may pilang mangunguma sa gihapon ro nagsugae sa pagtanum it paeay sa pihak it limitadong suplay it tubi ag nagsalig sa bulig it sangkiri nga uean.
Samtang, gindugang pa ni Engr. Apolonio nga padayun nga ginasueong ro long-term solution sa problema sa irigasyon, kaibahan ro pagpabaskog sa National Irrigation Administration o NIA ag rehabilitasyon it mga irrigation canal ag dam sa probinsiya.
Apang nagakinahangean sigon ro mga raya it mabahoe nga pondo, rason nga nagaeaum ro provincial government nga maka-access ro NIA it kinahangeanon nga budget para sa mga proyekto.
