KALIBO,Aklan– Ginaduso makaron sa Kalibo Sangguniang Bayan ro sangka resolusyon nga tuyong magtaeana ro lokal nga gobyerno it Kalibo it nagakaigong pondo agud nga makaangkon it renewable sources of energy ro mga pampublikong eskwelahan sa nasambit nga banwa.
Raya hay para mabuhinan ro bueanan nga utility expenses it mga public schools.
Suno kay Sangguniang Bayan Member Phillip Yerro Kimpo, nagdihon it nasambit nga resolusyon, sambilog sa expenses it mga pampublikong eskwelahan hay ro bueanan nga baeayran it kuryente ag tubi.
Kun sa siin mas nagataas pa ro paeanuktan eabi eon kun may bisita maghalin sa ibang eskwelahan kapareho it mga atleta.
Ginpahayag dugang ni Kimpo nga tinutuyo karang maka-install it solar panels ag rainwater harvesting system sa tagsa ka pampublikong eskwelahann agud nga maskin paanu hay makatipid ro mga raya.
Mabahoe sigon rayang bulig engkaso nga mapatuman bangud sa baylo nga ibayad sa kuryente ag tubi hay pwede sigon nga itaeana ro kwarta sa pilang ka materyales nga pwedeng gamiton sa eskwelahan.
Angot kara, nagaeaum man ro konsehal nga maaprobahan it plenaryo ro nasambit nga resolusyon agud nga makabulig man sa pamunuan it mga pampublikong eskwelahan kamana man sa mga manugturo ag estudyante
