KALIBO, Aklan – – – Patay ro sangka eaeaki matapos nga nagbigti sa anang kaugalingon sa Brgy. Mandong, Batan.
Uwa eon it kabuhi nga nadiskubrehan it anang pamilya ro sangka 18-anyos nga biktima matapos nga naghigot raya it nylon sa anang liog.
Suno kay PO2 Jessie Laus it Batan Municipal Police Station, bandang alas-5:30 it kaaganhon kat gin-impormahan sanda may kaangtanan sa insidente ag sa andang pag-usisa sa lugar hay naabutan eon nanda ro eawas it biktima nga nahukas eon raya sa pagkabitay ag uwa eon it kabuhi.
Base sa andang imbestigasyon nga ginpatigayon, kat ginsikyar sigon imaw it anang lola hay dikara eon nadiskubrehan ro anang ginhimo nga pagpakamatay.
Ginpahayag dugang nga uwa it nakit-ang suicide note sa natabuan it insidente.
Apang, may text message sigon sandang nabasahan kon siin nagasugid nga kato pa gusto it biktima nga wakasan ro anang kabuhi apang makaron eamang nana raya ginpatigayon.
Ginapatihan nga posibleng problema sa pamilya ro naging kabangdanan kon ham-an it gin-utas it biktima ro anang hueam nga kabuhi pamaagi sa pagbigti sa kasagsagan ko selebrasyon it bisperas it paskwa.
