KALIBO, Aklan—Nasapwan nga uwa eon it kabuhi ro sangka 23-anyos nga soltero matapos nga nagbigti-patay sa baeayon it sangka warehouse sa District 3 Brgy. Pinamuk-an, New Washington.
Suno kay P/Cpl. Jhon Valencia it New Washington Police Station, bandang alas-10:00 it agahon kat nakabaton sanda it report maghalin sa kapitan it natungdan nga barangay nga may nakit-an nga patay nga eaeaki ag nagabitay.
Sa andang pagpangusisa hay naabutan ro biktima nga uwa eon sa crime scene bangud nga insigida sigon raya nga ginbueo it anang tiyo halin sa pagkabitay kat nataeopangdan sa warehouse apang binawian eon it hueam nga kinabuhi.
Suno pa kay P/Cpl. Valencia, nylon rope ro ginhigot it biktima sa anang liog antes nga nagbitay sa baeayon.
Kumbinsido sigon ro pamilya nga uwa it foul play sa kamatayon it soltero bangud nga ginapabutyag nga may deperensya raya sa paino-ino apang uwa it dokumento ro pamilya nga maipakita sa kapulisan nga makapamatuod nga may ginabatyag nga sakit ro andang onga.
