KALIBO, AKLAN — Nagpakamatay pamaagi sa pagbigti sa kaugalingon ro sangka 20-anyos nga soltero bangud sa mga ginaalegar nga nakikit-ang kababalaghan ag mga nababati-ang hutik sa Brgy. Ginictan, Altavas, Aklan.
Patay eon kat madiskubrehan ro biktimang si Jen Mark Geroy, residente it nasambitang lugar, matapos nga makit-an it anang ina nga nakabitay sa kisame it andang payag may 50 metros ro kaeayuon halin sa andang baeay gamit ro sangka eubid.
Mag-eowas sa marka it eubid sa anang liog hay may nakitang madaeom nga nina sa anang waea nga pulso.
Suno sa ina it biktima nga ko Oktubre 2016 pa may nakikit-ang kababalaghan ro anang onga ag mga nababatiang hutik kabangdanan it grabeng kahadlok nga nabatyagan kara.
Insigida nga gindaea sa Altavas District Hospital ro biktima, apang patay eon nga makaabot.
Nakataeanang igapaidaeom sa post mortem examination ro bangkay it soltero.
