KALIBO, Aklan—Normal eon ro pagpangabuhi sa South Korea maskin nga ro COVID-19 cases hay owa naganaba sa 200,000 kada adlaw.
Suno kay Bombo International Correspondent Maylord Guadalupe it South Korea nga ginakabig eon lang nga matsa trangkaso ro nasambit nga sakit, kun sa siin, owa eon haeos naga-panic ro mga koreano.
Kaeabanan suno kana sa mga nagapositibo sa deadly virus hay naga-self isolate ag sanda eon ro nagabueong sa andang mga kaugalingon.
Apang obligado gihapon ro tanan nga magsunod sa minimum health and safety protocol.
Ginaprayoridad makaron it gobyerno ro pagtau it booster shots nga 4th dose sa andang mga pumueuyu matapos nga sumaka eon sa 5.8 million ro kaso it covid 19.
Bukas sigon ro andang vaccinations sites sa mga local ag foreigner.
Sa pihak nga parte, indi pa sigon masyadong mabatyagan sa South Korea ro impact it nagatinaas nga presyo it produktong petrolyo sa world market sa atubang it tensyon sa tunga it Russia ag Ukraine.
Suno kay Guadalupe nga mag-eowas nga may ginaboe-an sanda nga supply it langis hay may andang nuclear power plant nga alternative energy rason nga indi masyadong mabatyagan ro pagtaas it presyo it mga nagapangunang baeak-eon ag serbisyo partikular ro sukot sa kuryente.
