Pagabuhion it South Korea ro sangka railway project nga posibleng magasugpon sa nasidlangang siyudad it Wonsan sa North Korea, sa pihak it nagapabilin nga pagiging maeamig it daywang nasyon.
Suno sa South Korea’s Unification Ministry, pagapadayunon it gobyerno ro rehabilitasyon it naputoe nga parte it Gyeongwon Line maeapit sa Demilitarized Zone (DMZ).
Gin-umpisahan ro proyekto ko 2015 apang napundo makataliwan ro sang dag-on.
Ginpahayag ni Unification Minister Chung Dong-young nga ro linya it tren halin sa Seoul hay pwedeng magsirbing koneksyon sa Wonsan sa paeaabuton nga mga inadlaw.
Ko 2024, ginguba it North Korea ro mga road ag rail link sa border bilang kaparte it tikang kara nga kabigon ro South Korea bilang sangka “hostile state.”
Tuyo it proyekto nga mapaeapad ro access sa mga peace ag ecological tourism site sa DMZ ag makabulig sa pag-umwad it ekonomiya sa mga border area.
Samtang, ginkilaea ni South Korean President Lee Jae Myung nga nagapabilin nga mabudlay ro pakikipag-angot sa North Korea bangud sa padayun kara nga pagpamalibad sa mga panawagan para sa mas maayos nga relasyon.
Ginpahayag man it Unification Ministry ro planong paeaparon ro paggamit it Inter-Korean Cooperation Fund agud nga suportahan ro mga proyekto sa border areas, peace economy, reunification initiatives, ag pagtu-on angot sa North Korea.
