KALIBO, Aklan—Aprubado eon sa ikatlo ag ulihing pagbasa it Sangguniang Panlalawigan it Aklan ro sangka ordinansa nga tuyo nga paeawigon ro deadline sa pagbayad it Real Property Tax sa bilog nga probinsya halin Marso 31 hasta Hunyo 30, 2022.
Tuyo kara nga mataw-an it kahigayunan ro hinyu it tanan nga mga municipal treasurer sa Aklan nga indi pagpasakaan it interest, surcharges ag penalty ro mga tax payer nga owa nakabayad halin 2018 hasta 2021.
Suno kay Sangguniang Panlalawigan member Soviet Russia Dela Cruz nga nabatyagan it tagsa ka mga lokal nga gobyerno ro paghina sa koleksyon it buwis matapos ro pagtama it pandemya.
Nagaeaum ro mga opisyal nga bastante eon ro nasambit nga tyempo para sa mga tax payer nga makabayad it buwis nga owa it ginapasaka nga anumang penalidad.
Natueopangdan sigon nanda nga amat-amat paeang nga nagabangon ro mga pumueoyo halin sa epekto it pandemya rason nga ginpasugtan ro hinyu nga pagpaeawig it deadline.
Natueopangdan nga nakaangkon it pagtaas sa collection it Real Property Tax ko Enero 2022 nga naga-abot sa P9.4 million kung igakumpara sa parehong period ko nagtaliwan nga dag-on nga nag-abot eamang sa P5.3 million.
