Gin-aprubahan it Sangguniang Panlalawigan it Aklan sa ginpatigayon nga regular session ro sangka resolusyon nga nagatau it pahanugot kay Governor Jose Enrique Miraflores nga magsueod sa memorandum of agreement ukon MOA sa Philippine Health Insurance Corporation ukon Philhealth angot sa pagpatuman it terms and conditions para sa pagtau it health based services.
Ro session hay ginpangunahan it temporary Presiding Officer ag Acting Vice Governor Jay Tejada.
Ro naging tikang it plenaryo hay base sa rekomendasyon it committee on health and social services ag committee on laws, rules and ordinances matapos ro maid-id nga pag-review.
Nauna eon nga nagtukod it Aklan Health Care Provider Network bilang pagpahaum sa implementasyon it Universal Health Care ukon UHC Law.
Bangud nga UHC implementing site eon ro probinsiya hay mataw-an raya it dugang nga bulig it Dept. of Health sa patag it technical capability, managerial, financing kapareho it special health fund ag iba pa.
Pinaagi man sa UHC law hay magadasig ag mapanami ro referral system sa tunga it mga health facility mapa pampubliko man ukon pribado.
