KALIBO, Aklan—Ginaduso it sangguniang panlalawigan it Aklan sa Department of Public Works and Highways ukon DPWH nga i-revisit ro construction it bike lane project sa national and local roads kun sa siin nag-arangkada eon raya sa banwa it Kalibo.
Raya ro ginpahayag ni SP member Apolinar Cleope kasunod it ginpatigayon nga legislative inquiry sa pagpanguna it committee on public utilities, transportation and communication ag committee on laws, rules and ordinances sa pagtalakay sa detailed engineering plan it expansion of active transport infrastructure partikular ro pagbutang it bike lane.
Sa masunod sigon nga regular session hay nakataeana nga igapresentar ro andang resulta it inquiry.
Ginarekomenda man sigon it provincial board nga magapasa sanda it resolution nga naga-engganyo sa Department of Transportation ukon DOTr ag DPWH nga suspindihon ro implementasyon it nasambit nga proyekto hasta nga owa pa raya natun-an it uman ag ginbag-o ro design nga magakabagay sa kundisyon it daeanon eabi eon sa banwa it Kalibo.
Ginpamilit ni Cleope nga owa sanda naga oponer sa bike lane project bangud nga raya hay para sa kaeowasan it mga siklista, apang tan-awon anay ro problema sa daeagan it trapiko kun sa siin masyadong ginakueang it space.
Ginahinyu nanda nga imbes nga butangan it bollard ukon abang ro bike lane hay obrahon raya nga shared lane.
