KALIBO, Aklan—Ginahinyu it mga miyembro it Sangguniang Panlalawigan sa Aklan ro manaba nga kapueongan it kongreso nga imbestigahan ro natabu nga patay-sindi nga supply it kuryente eabi eon ko ulihing domingo it Abril.
Suno kay Aklan 2nd district board member Jay Tejada nga sangka resolution ro andang gindihon nga naga-engganyo sa committee on energy it kamara pinaagi kay Aklan 2nd district representative Teodorico Haresco nga usisaon ro kabangdanan it serye it mga power disruptions ko Abril 27, 28, ag 29 sa isla it Panay, Guimaras, ag Negros ag makahimo it legislative solutions agud nga matapna ro kaparehong insidente sa ulihi nga mga inadlaw.
Ginpamilit ni board member Tejada nga maka-alarma ro pagtuhaw it power crisis bangud sa posibilidad nga maka apekto raya sa industriya it turismo sa Boracay ag pangkabilugan nga ekonomiya it probinsiya it Aklan.
Ro approved resolution hay gin-transmit makaron nga adlaw sa kongreso.
Sa pihak nga parte, gindugang pa ni Tejada nga aprubado man ro gindihon nga resolusyon ni Aklan 1st district board member Nemesio Neron nga magpatigayon it kaugalingon nga imbestigasyon ro provincial board angot sa natabu nga power outage.
Suno kana nga plano nanda nga ipatawag ro National Grid Corporation of the Philippines (NGCP) ag mga power distributors kapareho it Aklan Electric Cooperative ukon Akelco, Timbaban hydro power ag wind power project.
Sa masunod nga domingo hay posibleng matalakay ro nasambit nga isyu.
