KALIBO, Aklan—Gintalakay sa ginpatigayun nga session it Sangguniang Panlalawigan it Aklan ro ginsumite nga resolution it lokal nga gobyerno it Malay.
Nakabaehag sa nasambit nga resolution ro paghinyu sa Protected Area Management Board (PAMB) nga kaparte it Department of Environment and Natural Resources (DENR) nga bawion ro andang endorsement sa pagpatindog it 300-megawatt (MW) hydro power plant sa Brgy. Nabaoy, Malay.
Mayorya sa miyembro it Sangguniang Panlalawigan ro nagpabor nga i-adopt ro resolution it lokal nga gobyerno it Malay.
Maatueopangdan nga hugut nga ginapamaeabagan it mga pumueoyo, opisyales ag grupo it environmentalist ro ginaproponer nga proyekto.
Raya hay bangud sa pagpati nga mabahoe ro magiging epekto kara sa kalikasan ag lokal nga komunidad engkaso nga madayun.
Owa man sigon sanda naila nga mauyang ro masobra 25 anyos nanda nga pagprotekta sa nasambit nga lugar agud ma-preserba ro mga endangered species.
Nasayuran nga nagabalor it masobra P26.3 billion ro gina-proponer nga 300-megawatt hydro power plant nga ginakaeakipan it upper ag lower dam.
