KALIBO, Aklan—Nakataeana nga magpatigayon it legislative inquiry ro natungdan nga komitiba it Sangguniang Panlalawigan it Aklan angot sa kakueangan it Caticlan Airport.
Suno kay Aklan first district board member Nemesio Neron, may mga mueo-mueo sigon ro pilang ka mga stakeholders angot sa kakueangan it nasambit nga paeoparan rason nga may nakataeana nga inquiry angot kara agud mataw-an it igtaeopangod ro komento it mga raya.
Gintaw-an it punto ni Neron nga mabahoe ro bulig it daywang ka paeoparan sa Aklan bangud nga mabahoe ro ginaamot kara sa ekonomiya it probinsya rason nga dapat man mataw-an it igtaeopangod ro mga komento eabi eon kon may una nga kakueangan.
Dapat suno kana nga insigidang masolusyunan kon may una gidman nga makit-an nga problema.
Nasayuran nga nagabaton it international flights ro Caticlan Airport bangud nga raya ro pinakamaeapit nga paeoparan para sa mga turista nga nagabisita ag nagabakasyon sa isla it Boracay.
