KALIBO, Aklan—Ginkumpirma eon ni Sangguniang Panlalawigan member Atty. Immanuel “Nolly” Sodusta nga magapadaeagan imaw bilang Vice Governor sa nagahilapit nga May 9, 2022 national and local elections.
Suno kay Atty. Sodusta nga magiging ka-tandem nana sa unang distrito it probinsya sanday SP member Atty. Harry Sucgang nga magapa-ilihir bilang kongresista ag si dating Kalibo Mayor William Lachica nga magapadaeagan bilang gobernador.
Nakaplastar eon man sigon ro andang line up sa pagka-alkalde, bise alkalde ag mga konsehal sa pilang banwa sa Eastern ag Western Side it Aklan apang may pila pa nga bukon it klaro rason nga hueaton eon lang ro pormal nga anunsyo sa pagahiwaton nga sang dominggong filing it Certificate of Candidacy (COC) umpisa Oktobre 1 hasta 8, 2021.
Tuyo sigon it andang grupo nga makaangkon it masinadyahon ag masaligan nga pagdumaeahan para mapahagan-hagan ro kabudlay nga nabatyagan it mga pumueoyo eabi eon makaron nga tyempo it pandemya.
