KALIBO, Aklan–Magaretiro eon sa pulitika si Aklan 1st District Board member Atty. Harry Sucgang matapos nga mapas-eawan sa anang kandidatura sa pagka-kongresista ko May 9, 2022 elections.
Suno kay Sucgang, magabalik eamang imaw engkaso nga ro mga tawo mismo ro magkumbinsi kana nga uman nga magpadaeagan.
Sa pihak kara, nagapasaeamat sigon imaw sa tanan nga nagsuporta kana hasta sa katapusan it anang karera.
Mabahoe sigon nga dungog nga nakatao imaw it malimpyu ag tampad nga serbisyo sa mga pumueoyong Aklanon sa mahaba nga tyempo.
Ginpahayag pa ni Atty. Sucgang nga posibleng maghimo imaw it libro angot sa anang mga eksperyensya ag sentimyento pag-abot sa daeagan it pulitika sa nasyon.
Nasubuan sigon imaw bangud kaabuan sa mga botante hay masami nga nagapadaea sa kwarta kada eleksyon rason nga nagadaog ro mga korap.
Tyempo eon sigon nga mabag-o ro sistema agud nga matapos eon ro kabuhay nga pag-antus it mga pumueoyo bangud sa saea nga pagdumaea.
