KALIBO, Aklan—Nagapati si Aklan 1st District Sangguniang Panlalawigan member Atty. Harry Sucgang nga napabay-an it gobyerno it Pilipinas ro pagtukib ag pagkaekae it langis ukon natural gas sa West Philippine Sea.
Raya suno kana ro posibleng rason it China sa pilit nga pag angkon sa WPS bangud nga mag-eowas nga may capital sanda para sa pagahimuon nga oil exploration hay nakikita nanda ro mabahoe nga pagakita-on sa nasambit nga venture.
Madumduman nga ginsuspinde ro oil exploration kunta it China ag Pilipinas bangud sa force majeure nga gina-angot sa pag-aeagawan it daywang nasyon sa bilog nga WPS.
Nagdaog ro Pilipinas sa kaso sa Arbitral Tribunal ag gintau sa nasyon ro tanan nga isla sa gahum it 200-mile Exclusive Economic Zone, kaibahan eon ro mga islang gina-angkon makaron it China.
Apang owa ginkilaea it China ro desisyon ag ginpamilit nga sakop it China ro haeos bilog nga South China Sea, kaibahan eon ro WPS.
Samtang, uman nga ginpakita sigon it amerika ro pagiging kaalyado it pilipinas pinaagi sa pagpatigayon it dag-unan nga “Balikatan” exercises sa tunga it mga soldado it nasyon ag estados unidos sa atubang it nagapadayun nga presensiya it mabahoe nga numero it mga barko it china sa West Philippine Sea.
