KALIBO, Aklan—Pabor si Aklan 1st district Sangguniang Panlalawigan member Atty. Harry Sucgang sa pagsueong it Charter Change ukon pag-ameynda sa Konstitusyon kon ro nagapangunang rason hay para sa pagpabaskog it ekonomiya it nasyon.
Apang dapat sigon nga bantayan it publiko ro isyu sa cha-cha bangud sa posibilidad nga mai-singit ro pagbo-oe sa term limit it mga politiko eabi pa ag nagahilapit ro eleksyon sa 2022.
Ginpaathag ni Atty. Sucgang nga sa presenteng konstitusyon, ginalimitahan ro access it mga foreign investors sa nasyon eabi eon sa public utilities kapareho it elektrisidad, tubi ag telekomunikasyon bangud sa isyu it national security.
Nauna eon nga nagpanindugan si Speaker Lord Allan Velasco nga indi pagatalakayon sa pag-amenya sa konstitusyon ro pederalismo ag maskin ro term extension.
Pagatutukan sigon kara ro pagbag-o sa “restrictive economic provisions” it charter, kun sa siin pagapasugtan ro foreign ownership sa eugta, educational institutions, public utilities, ag mass media firms.
