KALIBO, Aklan—Ginkumpirma sa Bombo Radyo Kalibo ni Aklan first district board member Nemesio Neron nga inde eon imaw magpadaeagan bilang alkalde sa banwa it Banga.
Madumduman nga naging matunog ko una ro pangaean ni Neron nga magapailihir bilang alkalde sa nasambit nga banwa ag paga-engkwentruhon si incumbent Banga mayor Noel “Boy” Redison.
Suno kay Neron, nabilog ro nasambit nga desisyon matapos ro makapilang beses nga pakikipagpueong kay dating Aklan governor Florencio “Joeben” Miraflores.
Ginpaathag kara nga nagatan-aw imaw it taeamdon rason nga nakadesisyon raya nga ipaiway eon lang ro anang nauna nga plano para sa paaeabuton nga 2025 midterm election sa buean it Mayo.
Apang, ginpasiguro kara nga una gihapon imaw sa pagbulig sa mga pumueoyo maskin nga uwa eon imaw sa pwesto bangud nga magapabilin sa anang tagipusuon kaibahan ro anang bilog nga pamilya ro pagserbisyo sa publiko.
Nasayuran nga makaron nga adlaw it Martes, Oktobre 1 hay magaumpisa eon ro pagdihon it certificate of candidacy it mga magakandidato para sa 2025 national and local election nga magatapos hasta sa Oktobre 8 it presenteng dag-on.
