KALIBO, Aklan–Hugut nga ginkondena ni Aklan 1st District Board member Nemesio Neron ro natabo nga assassination kay Negros Oriental Governor Roel Degamo ko Sabado it agahon sa mismong panimaeay kara sa Sitio Nueve, Brgy. San Isidro, Pamplona.
Suno kay Neron, kinahang-ean nga mataw-an it nagakaigo nga aksyon ro insidente ag mapasabat ro pinaka-utok sa krimen.
Kinahang-ean sigon nga matuldukan eon ro karumal-dumal nga pagpamatay sa mga pulitiko ag sibilyan.
Mag-euwas sa gobernador, lima pa sa anang bodyguard ro namatay ag kapin sa waeong nga sibilyan ro binawian man it hueam nga kabuhi.
Samtang, may iba pa nga gindaea sa ospital ag padayun nga ginabueong.
Nagapati si Neron nga professional ro mga umatake sa compound ni Governor Degamo kamana man nga ginplanuhan it mayad ro detalye it andang paghueag.
Bangud sa hitabo, dapat sigon nga magdoble dahan ag mas pang pabaskugon it mga security personnel ro andang pagbantay para masiguro nga indi sanda masalisihan it mga kriminal.
Ipabilin suno kana ro pagiging vigilante sa tanan nga kahigayunan ag indi magpakampante.
